New York-ah Muslim Day Parade nei

New York-a Madison Avenue-ah Pathianni tlai khan Muslim Day Parade vawi 35-na neih a ni a, he parade-ah hian Kashmir leh Muslim inpumkhatna lam pholan a ni. 

Parade buatsaihtute chuan Muslim American 3,000 vel an tel niin an sawi. Muslim Day Parade buatsaih ṭhinin a tum ber chu an sakhuain hnam hrang leh culture hrang hrangte a huam tih lantir te, an hnathawh leh hlawhtlinna hrang hrang lawmna lantirna hun a ni tih parade chairman Farris Fayyaz chuan a sawi. Parade-naa telte chuan khawthlang mipuite rilruah Islam hnualsuatna leh hlauhna awm ṭhin an duh loh thu leh, Muslim hrekbeh an ni ṭhin an duh loh thute an sawi. 

Kumin parade-ah hian India sorkarin a ram chhunga Muslim tamna bial, Jammu and Kashmir special status a tihtawp sak hnuah mipuite khuahkhirhna leh hrekna a siam zuite an duh loh thute an sawilang bawk. Fayyaz chuan Kashmir dinhmun tawn mek chu  ngaihthah mai chi a ni lo, hetihlai hian khawvel chu Kashmir chungchangah an ngawi tlat thung a ni, a ti. Kawngzawhnaa telte chuan India prime minister Narendra Modi chu hma la tura phutin, Kashmir-a mihring dikna chanvo humhalh sak an phutna thuziakte an keng bawk.