Argentina-ah solar plant thar bun

Argentina hmarthlang lama Salta province-a Cafayate khuaah solar plant thar, photovoltaic plant chu Chinese tech­nology-te puihna hmanga din a ni. 

Cafayate khuaa solar plant thar photovoltaic plant sak mek hi kumin kum tawp lama zawh fel hman tum a ni. Argentina khawpui Buenos Aires aṭanga km 1,400 hla a awm a ni a, he solar plant thar hian chhungkaw 300,000 ma­mawh power supply phu­hruk theih tura duan a ni.

He solar plant thar dinna tura Argentina thawhpuitute chu Chi­nese company lian POWERCHINA Ltd. a ni. Argentina hmarthlang lam power mamawh tam tak he project thar hian a phuhruk thei dawn a ni. Heng bakah hian industry-a hnathawktuten power an mamawhna tam tak pawh a tihziaawm phah theih rin a ni.

Hectare 300-a zauah solar panel 290,000 chuang dah tum a ni a, solar plant thar hi chhungkaw hman atan power supply megawatts 100 pe chhuah thei tura duan a ni bawk. "Argentina-ah hian power supply kan neihna ber chu hydropower plant aṭangin a ni a, amah­erawhchu tui tlem vangin kan ram hmarthlang lam te power mamawhna erawh a phuhru zo lo em em a, hei vang hian Cafayate khuaah hian solar power plant thar siam kan rawt ta a ni," tiin Cafayate Security and Environmental Officer Sebastian Lozano chuan a sawi.     

Project leader Eduar­do Dequi chuan solar panel 290,000 chuang an dah tumte hi pakhat len lam chu metre khat a sei leh metre hnih a sang a nih thu a sawi. Nikhatah darkar 10 power a pe chhuak thei dawn a ni. He power plant thar hi kum 25-30 chuang a daih dawn thu a sawi bawk.

Solar plant thar hi tun thla aṭanga hmalakna kalpui a ni a, mihring 3,000 vel hnathawk an awm mek. Technical leh professional worker bik atan hian mi 20 hman an ni bawk. Cafayate khuaa photovoltaic plant thar mai bakah hian, Argen­tina-a energy plant Cau­chari solar park leh Chubut province-a Pata­gonian wind farm pali siam tawh ah China hian a pui a ni. Cafayate power plant hi Cauchari solar park tih lohah Argentina solar power plant lian ber dawttu a ni.

"Solar power plant kan hman avang hian, nakinah chuan natural resources kiam zel tur a ven theih ka ring tlat a ni," tiin Lozano chuan a sawi bawk.