Myanmar legistator-te open-air centre ah hreng

Myanmar sipaite chuan State Councellor Aung San Suu Kyi leh hruaitu dangte man a, thuneihna an chhuh sak hnuah Parliament member 400 vel chu an ram khawpui, Nay Pyi Daw-a open-air detention centre-ah a hreng zui. 

Legislator pakhat chuan govern­ment housing complex-ah hren an nih thu sawiin, phone hmangin an inbe thei a, mahse compound erawh chhuahsan phalsak an ni lo tih a sawi. Complex chhungah police-te awmin, a pawn lamah sipaite an duty bawk. 

Sipaiten an hrente hi Suu Kyi-i party, National League for Democracy (NLD) leh an party thlawptu party tenau dang member-te an ni. Legislator-te chuan hlau­thawng lo tura hrilh an ni nain, hmun danga kal phalsak an nih loh avangin an ngaih a ṭha lo hle tih an sawi. 

Suu Kyi leh hruaitu dangte man an nih hnu lawka Myanmar ram chhunga phone leh internet connection tihtawp chu nimin zing aṭang khan hman theih a ni leh ta. Mahse boruak a la ralmuang lo hle a, khawpui hrang hrangah sipai ṭhahnem tham tak duty tir niin, zan lamah curfew puan a ni bawk. 

Thawhṭannia sipaiten an man, Aung San Suu Kyi hi khawi hmunah tak nge an dah sawilan a ni lo a, mahse NLD hruaitute chuan Suu Kyi leh president Win Myint-te chuan inah pawn chhuak thei loa hren beh niin an sawi a, mahse biakpawh theih an ni lo. 

Suu Kyi hi kum 1989-2010  inkar chhung khan democracy tundin tuma a beihna avangin sipai sorkar chuan a chenna inah pawn chhuak thei loin a lo hreng tawh a ni.

Myanmar thil thleng chung­chang sawiho turin nimin khan United Nations Security Council (UNSC) chuan emergency meeting a ko. 

Meeting hi video conference hmanga neih a ni dawn a, closed door-a neih a ni ang. Meeting-ah hian special envoy for Myanmar, Swiss diplomat Christine Schraner Burgener chuan council member-te hmaah Myanmar ram thil thleng chungchang hi a hrilhfiah dawn a ni. 

Myanmar sipaiten sorkar paih­thlaa thuneihna an chhuhsak chuan an ram economy a nghawng pawi dawn hle niin zirchiangtute chuan an sawi. 

Company tam tak, investment lian tham titute chuan an dinhmun a derthawng hle niin an sawi. Myanmar rama Foreign Direct Investment (FDI) hi 2020 fiscal year-ah US dollar tluklehdingawn 5.5 vel a ni pha a, he kum kal  mek hi September thla hian a tawp dawn a ni. Sipaiin thuneihna hi an chelh chhunzawm zel chuan sorkar kum tharah FDI hi  nasa taka a tlakhniam rin a ni. 

Myanmar civil sorkar thuneihna paihthlak a nih hnua an ram thuneihna chelhtu thar general Min Aung Hlaing hi kum 64 mi niin, kum 10 chhung chu commander-in-chief a ni tawh. 

Yangon University-a law student ṭhin niin, kum 1974 khan Defence Services Academy-ah a lut. Sipaia a luh hnu hian an ram khawchhak lama helho beihnaah pawh a tel nasa hle. Kum 2011 March 30  khan sipai hotu lu ber, commander-in-chief ah dah niin, National Defence and Security Council (NDSC) member a ni bawk