US President Biden-a'n Myanmar ram hrekah a vau

US President Joe Biden chuan Myanmar sipaite chet dan a dem thu sawiin, democracy thlavang hauh turin US chu a ding zel dawn tih a sawi. 

Joe Biden chuan sipaiten civil sorkar thuneihna a chhuhsak leh ram hruaitute a hreng chu demo­cracy beihna leh dan palzutna lian tak a ni tiin, US chuan Myanmar ram hekna thar siam chu a hrek dawn hauh lo tih a sawi  a ni. US-in Myanmar ram a hrekna hi Barack Obama President hun lai khan a lo hlip tawh a ni.  

Thuchhuah siamin, US President chuan Myanmar sipaite chetdan dem tura ram hrang hrangte an inthurual a ngaih thu a sawi, Myan­mar ramin hun harsa tak a tawh mekah an tana ding tute chu US chuan a hrereng dawn a ni, a ti. 

China-in demna thu sawi lo

Ram hrang hrang, a bikin khaw­thlang ramten Myanmar sipaite chet dan an dem thu sawiin, an mi hrente chhuah nghal tura an phut laiin China chuan sipaite chetna sawiselna lam hawi thu a la sawi chhuak lo. 

China chuan Myanmar rama thil thleng chungchangah pawl hrang hrangte chu an inhriatthiam lohna siamṭha tura a duh thu chiah a la sawichhuak. State media-te chuan sipaiten civil sorkar thuneihna an chhuhsak chu 'cabinet siksawina liantham tak' tih chauhin an tarlang a ni. Foreign ministry thupuangtu Wang Wenbin chuan Myanmar rama thil thleng chungchanga China ngaihdan an zawhah, thil awmdan kimchang an la zirchiang mek niin a sawi.