Zimbabwe president-in tualchhung buaina vangin zin hun pawt tawi

Europe ram tlawh tura zinchhuak, Zimbabwe President Emmerson Mnangagwa  chuan an rama tualchhunga  buaina thleng vangin a zin hun a pawt tawi a, Thawhṭanni zan khan an ramah a kir leh nghal. 

Mnangagwa hian Davos economic summit hman a tum a, he hunah hian Zimbabwe ram tana investment ti turte zawn nghal a tum a ni. Mahse an ram chhungah tuialhthei man tihsan tum vanga lungawi lohna lantirnaa tharum thawhna nasa tak a thlen avangin a summit pawh hmang hman loin a kir leh nghal a ni. 

Zimbabwe minister-te chuan eptu pawl, Movement for Democratic Change (MDC) chu tuialhthei man tihsan tum hi buaina chawkchhuahna chhuanlamah an hmang niin an puh a, hetihlai hian MDC lam chuan lungawi lohna lantirte chu sorkar thuneituten tharum hmangin an beih let tir niin an sawi thung. 

Right groups-te chuan Zimbabwe khawpui, Harare leh chhimthlang lama Bulawayo khawpuia nawrh huaihawtna buaina chhuak vanga thi hi mi 12 an tling niin an sawi. Nawrh huaihawt zinga mi 700 vel man an ni tawh bawk. 

Nawrh huaihawttu, Zimbabwe Congress of Trade Union chuan an pawl hruaitu Japhet Moyo man a nih thu an sawi a, MDC hruaitu Nelson Chamisa pawhin an party member eng emaw zat man niin an zingah hian MP pali pawh an tel niin a sawi bawk. 

President Mnangagwa chuan ramin tuialhthei an indaih lohna nasa tak tihziaawmna atan leh, dan loa tuialhthei hmanga sumdawnna venna atan a man tihsan a ni dawn tih a lo sawi tawh a, hei hi eptu pawl leh mipuiten na takin an sawisel nghal a ni. A man bihthliah thar hi hman a nih chuan Zimbabwe hi hi khawvela tuialhthei man sanna ber tur a ni dawn tih GlobalPterolPrices.com chuan a tarlang. 

Zimbabwe ram hian sum lamah harsatna nasa tak a tawk mek a, thil man pawh a sang chak hle. Kum 2017 November thlaa thuneihna a chan khan President Mnangagwa chuan an ram sum dinhmun siamṭha tura theihtawp chhuah a tiam a ni.