Israel-in airport thar a hawng

Israel chuan Thawhṭanni khan Eilat-a Red Sea resort bulah international airport thar a hawng a, hei hian Europe ram aṭanga khualzin tam zawk a hipluh a beisei a ni. 

Airport thar hawnna inkhawm buatsaih hi Prime Minister Benjamin Netanyahu-an a telpui a, he airport hi ṭangkai taka hman a ni dawn tih sawiin, emergency thilah pawh an hmang ṭangkai dawn hle tih a sawi. 

Kum 2003-a space shuttle chhiatna thlenga nunna chan, Israel astronaut leh a fapa, Air Force F-16 pilot, kum 2009-a an training laia chetsualna thlenga  nunna chante hming chawia Jordan ramri bula airport siam thar hi  Ilan and Assaf Ramon Airport tih vuah a ni. Dollar maktaduai 500 senga siam airport thar hi single-runway niin thlawhtheihna lian ṭum theihna tura duan a ni a, kum khatah khualzin lut leh chhuak maktaduai 2.5 a dawn theih beisei a ni. 

Israel official-te chuan Ramon airport hi Red Sea ṭhenawm, Jordan leh Egypt ramte pawhin an hlawkpui thei dawn niin an sawi. Ramon airport hi Gaza aṭanga km 200-a hla leh, Lebanon aṭanga km 370-a hlaa awm a ni a, Islamist hel lakah pawh a him tura ngaih a ni. 

Jordan chuan Israel airport thar siam hi a sawisel thung a, Jordan Civil Aviation Regulatory Commission hotu  Haitham Misto chuan airport awmna hmun chu an ram khawchhak lam ramri nen an inhnaih em vangin an duh loh tih sawiin, internatinal standard a bawhchhia niin a sawi.