Netanyahu leh Gantz ten unity sorkar siam dan ngaihtuah remti

Israel prime minister Benjamin Netanyahu leh a elpui ber, Blue and White party hotu Benny Gantz te chuan thuneihna insem a sorkar siam dun dan ngaihtuaha inbiak an remti. 

September 17-a Israel inthlanpui neihah khan party mala sorkarna siam thei an awm loh avangin, ṭangrual sorkar siam dan ngaihtuah mek a ni. Inthlanah hian Blue and White party hian seat la hnem berin, Parliament seat 120 awmnaah seat 33 an la a, Netanyahu-a party, rorellai Likud Party hian seat 31 a la ve bawk. 

Thawhṭanni zan khan President Reuven Rivlin chuan party hruaitu pahnihte hi Jerusalem-a a office-ah a kawm a, darkar hnih chhung zet an inkawm a ni. Hemi hnu hian Gantz leh Netanyahu chuan thuchhuah inṭawm siamin, an party aiawhte chuan inbiakna an neih tur thu an sawi. Hemi hnu hian an pahnihin president hi an hmu leh dawn a ni. 

President Rivlin chuan sorkar ngelnghet a awm theihna turin party pahnihte chuan unity sorkar an din a ṭul nia a ngaih thu a lo sawi. Mipuite chuan inthlan buatsaih nawn leh an duh tawh lo a ni, a ti. Kumin April thla khan inthlanpui hi an lo nei tawh a, party mala sorkar siam thei an awm loh vangin ṭangrual sorkar siam turin hun pek an ni. Mahse hun pek chhunga sorkar siam thei an awm tak loh vangin inthlan hi buatsaih nawn leh a ni ta a ni.