Tokyo court-in Nissan hotu hlui bail dilna hnawl

Tokyo District Court chuan nimin khan Nissan Motor Co. chairman hlui, Carlos Ghosn-a bail dilna chu a hnawlsak. 

Kum 64 mi, Carlos Ghosn hian kum sawmhnih chhung Nissan Motor Co. chairman hna a lo chelh tawh a, Nissan aṭanga zangnadawmna a hmuh dan chungchangah financial report dik lo siamah puhin nikum November thla khan man a ni. Hetihlai hian Ghosn chuan tihdik loh a neih loh thu sawiin, pawisa pek a nih chungchangah Nissan hian sum a hloh lo a, danin a pawmpui hnuaiah sum hi pek a ni tih a sawi thung. 

Nimina khan court hian Ghosn bail dilna hi a ngaihtuah a, Ghosn hian bail-a chhuah phalsak a nih chuan electronic monitoring ankle bracelet vuah a, a passport thehluh leh a security guard turte rawihna man pawh pek vek a tiam a, mahse hetichung hian court chuan a dilna hi a hnawlsak a ni. Ghosn-a lawyer-te chuan Tokyo court-in bail-a chhuah dilna a hnawlsak hi court sang zawkah appeal an tum tih an sawi.