UN General Assembly 2019 hmang mek

United Nations General Assembly chu Saudi Arabia oil facility beih a nih vanga Middle East-a buaina nasa tak chhuak mek karah leh 'climate change' vanga hmalak duhtuten khawvel hmun hrang hranga kawng an zawh mek karah neih a ni.

Kar hmasa Thawhlehni, September 14 khan UN General Assembly 74th Session hawnna hi neih a ni a,  September 24 aṭang khan  high-level General Debate an ṭan chauh thung. Thawhṭanni khan  UN Sec­retary-General Antonio Guterres kaihhruaina hnuaiah Climate Summit neih a ni a, Universal Health Coverage (UHC) chung-changah meeting an nei bawk.

Thawhlehni General Debate ṭanni khan Mahatma Gandhi piancham kum 150-na pualin khawvel ram hrang hrang hruaitute chuan zahna an lantir.

Debate kal mek ṭanni, Thawhlehni khan UNGA president Tijjani Muhammad-Bande chuan khawvel puma remna leh muanna, venhimna ṭha neih chu UN hnathawh laimu ber a nih thu sawiin, ram hruaitute chu retheihna umbona, sik leh sa inthlak zel leh zirna ṭha a awm theihna lam ngai pawimawh turin a chah.

UN Secretary-General Antonio Guterres pawhin ram hrang hrang hruaitu kalkhawmte chu mihring ngaipawimawh hmasa turin a chah ve bawk. Remna a awm theihna tur te, mihring dikna chanvo humhim a nih theihna tur leh intluktlan lohna do zel turin a chah a ni.

Brazilian president Jair Bolsonar chu thusawi hmasa ber niin, US president Donald Trump chuan a dawt a ni. Trump hian dan loa ram danga luh chu khawvelin chona a hmachhawn lian ber zinga mi a nih thu a sawi a, China-in sumdawnna a kalpui dan chu a dik tawk lo tih a sawi bawk.

General Debate-ah hian ram hruaitu lu ber 91 leh sorkar lu ber 45-ten thu an sawi ang.

Britain prime minister Boris Johnson chuan beisei loh deuhin Brexit chungchanga  sawilang vak lo a, technology hlauhawmna thu lam a sawi tam thung.

Japan PM Shinzo Abe chuan NKorea hotu Kim Jong Un hmaichhana hmuh a duh thu a sawi a, NKorea chungchangah chuan Trump a thlawp thu a sawi bawk. 

w    New York khawpuia neih mek UN General Assembly hi a ṭum 74-na a ni

w    Thawhlehni aṭang khan General debate ṭan niin, karleh Thawhṭanni thleng a awh ang

w    Kumin UNGA General Debate theme atan hian  "Galvanizing multilateral efforts for poverty eradication, quality education, climate action and inclusion" tih an hmang

w    Vawiin hian financing for development (FfD) meeting leh 'elimination of nuclear weapons meeting' an nei dawn.

w    Naktuk hian small island developing States (SIDS) chungchangah meeting an nei ang.

w    UNGS 74th Session president atan Nigerian diplomat leh academic Tijjani Muhammad-Bande chu ruat a ni a, ani hian 'theme' tur pawh hi a thlangchhuak a ni.

UN General Assemly General Debate-ah hian UN member state aiawhten thu an sawi ṭheuh ṭhin a, mi pakhatin minute 15 chhung hun neiin, he hun hi UNGA hun ngaihpawimawh a ni a, a tlangpuiin ni nga chhung a awh ṭhin. Member ram tinin thusawina hun an neih avang hian an ngaipawimawh hle ṭhin.