Thunberg hnenah Award hlan dawn

Swedist climate activist Greta Thunberg chu human rights chawimawina sang, Right Livelihood Award dawng turin an thlang.

Right Livelihood Foundation chuan khaw­vel sik leh sa danglam chak zel venna kawngah, rang taka hma la tura ram hruaitute ngen a, midangte rilruah leilung humhalh duhna rilru a tuhsak avangin Swe­dish tleirawl kum 16 mi, Thunberg hi chawi­mawina dawng tura thlan a ni tih a thuchhuah siamah a tarlang. 

Greta Thunberg hian nikum August thla aṭang khan global climate movement, 'Fridays for Future' chu a kalpui ṭan a, a hmalakna hi khawvel ram hrang hrangah school naupang leh ṭha­laiten an thlawp ṭha hle. Kar liam ta Zirtawpni pawh khan khawvel ram hrang hrang 150 chuangah 'Global Climate Strike' protest hi neih a ni a, politician-te chu leilung leh boruak chhe zel tur venna kawnga rang taka hma la turin an ngen. Ram hrang hranga kawngzawhnaa telte hi mi maktaduai li vel zet an tling. 

Kumin hian Right Livelihood Award hi midang pathum pek an ni dawn bawk, Sahrawi human rights activist Aminatou haidar, lawyer Guo Jianmei leh Brazilian Hutukara Yanomami Association leh an hotu Davi Kopenawa te chu hlan  ni  bawk ang. 

Khawvel chawi­mawina sang, Nobel Prize dawngtu tur thlangtu, Nobel Foundaton-in environment and internatioanal develop­ment lama thawk ṭhate puala award a siam ve duh loh avangin, kum 1980 khan Swedish-German philatelist Jakob von Uexkull chuan Right Livelihood Award hi a siam a ni.