Pakistan-ah magnitude 5.8-a nain lir a nghing

Pakistan-ah Thawh­lehni khan magnitude 5.8-a nain lir a nghing a, hriat theih chinah mi 21-an thi a, mi 320 chuangin hliam an tuar bawk.

Lirnghing inṭanna hi Jhelum district hmar lam km 5 a hla leh km 10 a thuk a ni a, Pakistan khawpui Islamabad aṭanga km 119 vela hla a ni bawk.  

Pakistan-controlled Kashmir (POK) huam chhunga Mirpur district chu a tuar na ber an ni a, he district-ah hian mi 20-in nunna an chan a, mi 300 chuangin hliam an tuar. Punjab province hmarchhak a awm Jhe­lum district-ah pawh mi 20-in hliam an tuar a ni. 

Mirpur-a medical college hostel building a chim a, lirnghing hian canal a tihchhiat avangin khaw ṭhenkhatte chuan tuilian an tawrh phah bawk. Kalkawng a pin nual avangin chhanchhuah hna hi duh anga chakin a kalpui hleih theih loh a ni.

Pakistan-a Water and Power Development Authority (WAPDA) chuan lirnghing vang hian harsatna a thlen belh loh nan Hydropower Station Mangla chu an khar rih thu an puan. Lir nghing tuarte chhanchhuah hna hi, National Disaster Ma­nagement Authority (NDMA) chairman Lt. General Muhammad Afzal chuan theih ang anga thawh nghal a nih thu a sawi. Lirnghing vanga thi hi an tam chhoh zel rin a ni a, thil chhiain a delh mihring an la awm nual thu tarlan a ni.