Australian Capital Territory-in ganja hman phal
Australia rama a hmasa ber atan Australian Capital Territory (ACT) chuan puitling tana ganja hman phalna a tichhuak.
Nimin khan ACT lawmaker-te chuan puitling tana ganja gram 50 thleng hman phalna leh an inbula chin phalna dan a pawm. In bula chin phal zat erawh bituk an nei thung.
Australia hmun dangah erawh ganja hman hi khap a la ni thung a, damdawi atana hman erawh 2016 aṭang khan phal a ni tawh. Australian Capital Territory dan siam hi federal level-ah khingtu an awm erawh chuan tihdanglam leh theih a la ni thung.
Ganja hman phalna (Recreational cannabis use) hi Canada, Spain, Uruguay leh US state ṭhenkhatah chuan pawm a lo ni tawh bawk. Australia bikah hian health lam thuneitute chuan kum 14 chin chung lam 35% zet chuan an hmang chhin tawh tih an sawi.
An dan siam thar hi nakkum January 31 aṭanga hman ṭan tun a ni a, hman phalna pe chhuak mah se zawrh erawh an la khap dawn thung. Mipui punkhawmnaa hman leh naupang bula hman pawh an khap ang. Ganja hman phalna dan thlawptute chuan hmansualna laka invenna a nih thu an sawi laiin, a dodaltute chuan mitam zawkin an hman phah dawn niin an sawi ve thung.
Dan siamtute hian federal level-ah khingtu an awm an ring lo hle a ni. Australian Capital Territory hnuaiah hian mi 4,00,000 vel an cheng a, Canberra khawpui leh a chhehvel a huam. State an nih loh avang hian federal level-ah khin thlak a harsa dawn lo a, 2013 pawh khan mahni anpui nupui/pasala neih phalna an siam chu khin thlak a lo ni tawh.