Israel sorkar thar Siam turin Netanyahu sawm

Israel president Reuven Rivlin chuan prime minister Benjamin Netanyahu chu ṭangrual sorkar thar siam turin a sawm. 

September 17-a Israel Parliament inthlan neihah khan party mala sorkarna siam pha an awm lo a, hei vang hian ṭangrual sorkar a din a ngai dawn a ni. 

Nilaini khan President Rivlin chuan party lian pahnih, Likud party hotu Netanyahu leh Blue and White party hotu Benny Gantz chu meeting a neihpui a, thuneihna sem zaia unity sorkar din dan ngaihtuah turin a ngen a ni. Mahse Gantz hian Likud party kaihhruai sorkar chu thawhpui a tum lo tih a sawi. 

Likud Party leh Blue and White party ten thawhdun an tum tak loh avangin, President chuan prime minister Netanyahu chu sorkar siam turin a sawm hmasa ta a ni. Netanyahu hi sorkar thar siam turin ni 28 hun pek a ni dawn a, hemi chhunga a tihfel theih loh chuan kar hnih chhung pawhsei a dil leh thei ang. Hun a neih chhunga sorkar thar siamtu tur a tifel thei lo a nih chuan, President hian Blue and White party hotu Gantz hi hun a pe ve leh dawn a ni. 

Likud party kaihruai right-wing bloc leh anmahni thlawptu, sakhaw bil party te hian Knesset-a seat 120-a majority nei tura seat ngai zat, seat 61 chu seat rukin an pha lo a ni. 

Inthlanpui neiha result kimchang tihchhuah a ni tawh a, Blue and White party hian seat 33 lain seat la hnem ber an ni a, Likud Party-in seat 32 an nei bawk. Likud Party hian seat khatin nei tlem zawk mah se, thlawptu an ngah zawk nia sawi a nih vangin President pawhin sorkar siam tur hian a sawm hmasa a ni.