Thailand aṭangin Myanmar mi 109 thawn kir

Myanmar immigration authorities-te chuan nimin khan Thailand aṭangin Myanmar mi, an rama dan loa pem lut nia sawi mi 109 chuang Myanmar ramah thawn kir an nih thu an tarlang.

Myanmar aṭanga hnathawka pem chhuak mi 109 zingah hian hmeichhia pakua an awm a, an vai hian Thailand Ranong Immigration Department kaltlangin Tanintharyi khua Kawthoung border gate aṭanga thawn kir an ni. 

Heng hnathawk tura Myanmar aṭanga pemte hi, Thai authorities-te chuan an visa a tawp tawh thu leh document felfai tak an neih loh avanga, thawn kir an nih thu an tarlang.

Kumin July leh August thla khan Myanmar migrant worker 258-te chu Thailand ram aṭang, Kawthoung border gate-a thawn kir an ni bawk. Heng thawnkir zinga a tam ber chu Tanintharyi, Yangon, Bago, Ayeyarwady, Mon leh Rakhine bial aṭangten an ni.