India PM award hleng vangin
Gates Foundation-in India prime minister Narendra Modi chu faina beihpui thlakna, Swachch Bharat Mission a kalpui avangin chawimawina, Global Goalkeerper Award a hlan. Mahse Modi-a hnena he chawimawina hlan a nih duh lohin foundation staff member pakhat chuan banna a thehlut nghal.
Kum 43, communication specialist Sabah Hamid chuan India PM Modi-a chuan a ram chhung ngei, Kashmir-ah inbiakpawhna leh inkalpawhna thlenga a hreksak laia chawimawina lo hlan chu thil dik lo tak a nih thu a sawi. An hotu lamte pawh an thil tih tur hi a dik lo tih a sawipui tawh a, mahse an thutlukna siam tawh hi thlak danglam an tum lo tih pawh a hre thuai niin a sawi. Hei vang hian thil dik lo tak kaltlangpui an tum luih avangin a tan chuan ban mai chu a tihtur awmchhun a ni, a ti.
Gates Foundation-in Modi-a chawimawina a hlan chungchang hi sawiseltu an awm nual. Nobel laureates pathum- Iranian activist Shirin Ebadi, Northern Irish peace activist Mairead Maguire leh Yemini journalist Tawakkol Abdel-Salam Karman te pawhin foundation hnenah hian ngaihtuah ṭha turin an lo ngen hial a ni.
Gates Cambridge scholar leh alumni pawhin Modi chawimawina hlan tum hi a kaihhruai sorkar hnuaia human rights palzutna nasa thleng mek haiderna a ni, an ti hial bawk. Online petition te siamin, Modi hnena award hlan tur hi ṭhulh tura ngen a ni a, singnature 1,00,000 zet an lakhawm tawh bawk.