Bangladesh-in Rohingya camp hung dawn

Bangladesh chuan an rama Rohingya camp chu security lam venthawn thilah bared-wire hmanga hung vek a tum. Camp-ah hian guard tower leh camera-te dah a tum bawk. 

Rohingya Muslim raltlan hi Bangladesh-ah maktaduai tel an la awm a, Bangladesh leh Myanmar sorkarin raltlante hruaikirna turin inremna siam tawh mah se, tun thlengin raltlan zingah Myanmar rama kir duh an la awm lo. Myanmar sorkar chuan raltlante hruai kir tum hian ruahmanna siam mah se, Rohingya te hian an khaw lama kir chu an tan a la him tawk lo niin an ngai a, hei vang hian Myanmar sorkar hnenah an himna tur tiam a, khua leh tui dik tak anga an pawm ve phawt an phut a ni. 

Raltlante hi Bangladesh chhimchhak lam, Myanmar ramri bulah ṭhahnem tham tak awmin, camp lian tak tak pathumah an khawsa mek a ni. Heng camp pathumte hi barbed-wire hmangin an hung vek dawn tih Bangladesh home minister Asaduzzaman Khan chuan a sawi. Hei bakah hian camp chhung leh a chhehvelte en thlithlai reng turin watch tower leh CCTV camera dah a ni dawn tih a sawi bawk. 

Human rights activist-te chuan Bangladesh thiltih tum hi an sawisel thung a, an thil tum hian refugee camp-te chu tanin lian tak angah a chantir mai dawn a ni, an ti.