Saudi Arabia-in foreign tourist tan visa thar duang
Saudi Arabia ram chuan ramdang khualzinte hipluhna turin kawng zau zawk a hawng a dawn.
Nimin khan Saudi Arabia chuan ram 49-te tan visa thar a hawng a, hei bakah hian hmeichhe khualzinte tana incheina kawnga khuahkhirhna a siamte pawh a thlahdul bawk. Tourism minister Ahmad al-Khateeb chuan an ram tana thil chhinchhiah tlak, hriatreng tur a nih thu a sawi.
A hma chuan Saudi Arabia hian visa hi sakhaw thila zin, sumdawng leh hnathawk tura kalte tan bik a pechhuak tlangpui a ni. Mahse khualzin tam tak an hip luh theihna turin visa thar hi a siam ta a ni. Hemi hmang hian khualzin pawh tam zawk an hip luh theih an beisei a, kum 2020-ah chuan tourism-a gross domestic product chu 3% aṭangin 10%-a a kaichhoh theih an beisei. Dan thar hnuaiah khualzin hmeichhia, an taksa pum khuh thawmhnaw inbel tura tih khuahkhirhna siam chu thlahdul a ni a, mahse zahawm taka inchei tura beisei erawh an ni tih a sawi.
Muslim ni lote tan erawh Mecca leh Medina khawpui tlawh khapna chu hman chhunzawm a la ni dawn a, zu pawh in phal a ni lo bawk ang. Minister chuan Saudi Arabia chu oil-ah chauha innghat lo a, tourism lamah sum tam zawk lakluh tumin ṭan a la mek tih a sawi. Kum 2030-ah chuan khualzin maktaduai 100 hip luh an tum thu a sawi. Kum 2017 khan khualzinte hip luh tam an nih theih nan thliarkar 50 chuang hawn a nih bakah, Red Sea-ah luxury resort tam tak hawn belh a ni bawk.