Iran-in Stena Impero a chhuah zalen

Iran-in thla hnih chuang liam taa a man, British flagged oil tanker Stena Impero chu nimin khan a chhuah ta a, tanker hian Iran a chhuahsan mek.

Swedish company Stena Bulk tanker Stena Impero hian Bandar Abbas port a chhuahsan thu tarlan niin, helai port-ah hian July thla aṭang khan a ding tawh a ni. Anmahni ram huna zing dar 9-ah khan international water lam panin a chhuak niin official-te chuan an sawi.

Stena Bulk CEO Erik Hanell chuan tanker chuan Dubai lam a pan tih sawiin hetah hian crew member-te chuan medical checkup an nei dawn a ni. Stena Impero hi July 19 khan Iran chuan "international maritime rules" bawhchhiaah puhin a man a, man a nih hma kar hnihah hian UK Royal Marines-te chuan Iran tanker Gibraltar an man a, hemi phuba lakna atan hian Iran hian a man niin mi tam tak chuan an ngai thung.

Gibraltar hian Iran tanker hi August thla khan US-in hreng rih tura a ngen chungin a chhuah luia, he tanker hian EU-in Syria a hrekna chu a palzut nia tarlan a ni. Gibraltar-in a chhuah chhan hi  Stena Impero chhuah zalen ve tura  Iran nen inremna an siam vang niin mi ṭhenkhat chuan an sawi.

Tun thla tir lamah khan Stena Impero crew member ṭhenkhat chu Iran hian a chhuah tawh thung.