Nigeria intihduhdahna hmun aṭangin mi tam tak chhanchhuak

Nigeria police-te chuan an rama Kaduna khawpui hmar lama in pakhat aṭangin mi 500 dawn an chhanchhuak tih an sawi. 

An mi chhanchhuahte hi mipa vek an ni tih sawiin, puitling leh naupangte an ni hlawm a, mi ṭhenkhat chu chain-a phuarbehte an la ni hlawm.

Kaduna state police chief Ali Janga chuan khawpuia in lian tak pakhat chu rinhlelh a nih thu an dawn avangin an dap ta tih sawiin, intihduhdahna in a nih thu leh, mihring sal ang maia hrehawm taka chhawrna hmun a nih thu a sawi bawk. 

An mi chhanchhuahte chu Nigerian vek an ni lo a, nasa taka tihduhdah an nih bakah mipat hmeichhiatna lam hawia khawih pawh an ni tel tih a sawi. Chaw puar khawp pek an ni lo a, in an chhuahsan pawh phal an ni lo bawk. Helai hmunah hian mi ṭhenkhat chu kum eng emaw zatte pawh hren an lo ni tawh a ni. 

He thubuai kaihhnawihah hian mi pariat man an ni tawh a, police-te chuan an va chhan­chhuahte chu an lawm hle tih an sawi bawk. An mi chhanchhuahte hi Kaduna-a stadium pakhatah hruai niin enkawl an ni phawt a, an chhungte an zawnchhuah dan turte pawh an ngaihtuah chhunzawm sak dawn a ni.