Aghanistan President thar tur thlang

Afghanistan President thar tur thlangin kar kal ta Inrinni khan Afghan mipuite chuan Taliban-te vauna karah vote an thlak. Hei hi kum 2001 hnuah president thlanna an neih ṭum lina a ni. 

An ram huna zing dar 7 aṭangin vote thlak ṭan a ni a, tlai dar 5 thleng hawn a ni. Vote nei mi maktaduai 9.4 awmin, an zinga 35% chu hmeichhia an ni. President thlanna neih tura chuh tuma inziaklut, registered contestant 18 an awm. Mahse an zinga pali chuan inthlan dawn hnaihah can­didate pakhat chu thlawpin an inhnukdawk leh a, hei vang hian candidate hi 14 an awm ta a ni. Candidate zingah hian president nilai Mohammad Ashraf Ghani leh sorkara chief executive Abdullah Abdullah-te an tel. 

Taliban firfiakte chuan inthlan hi tihbuai an tum thu sawiin, mipuite chu vote thlak lo turin an lo vau lawk a ni. Hei vang hian vote thlak ni hian venhimna khauh taka kalpui a ni. Vote thlak tibuai khawp buaina liantham chhuak a awm lo niin Independent Election Commission chairperson Hawa Alam Nuristani chuan a sawi. 

Inthlan result hmasa hi October 19 hian puan a ni dawn a, result kimchang erawh November 7-ah tihchhuah a ni ang. Afghan dan hnuaiah, inthlan kaihhnawiha complaint thehluhte chinfel vek a nih hma chuan official result hi tihchhuah theih a ni lo. 

Candidate zingah vote tla aṭanga 50%  hmu pha an awm loh chuan, candidate zinga vote hmu sang pahnihten inthlan thawh hnihna an hmachhawn a ngai ang.