Saudi Arabia-in khawlaia inchei dan tur duang

Saudi Arabia chuan tunhnai lawkah ram 49-te tan visa thar a hawn hnuah leh, ramdang khualzin hmeichhiate inthuam dan tura khuahkhirhna a siamte a thlahdul hnuin, kar kal ta Inrinni khan khawlaia inchei dan tur leh midangte hmuha awm dan tur dan thar a duang.

Saudi Arabia-in dan thar a siamah hian, khawlaia thawmhnaw zahawm lo ha ṭhinte leh khawlaia midangte hmuha mawi lo zawnga che ṭhinte chu sum chawitir an ni ang. Interior ministry chuan dan bawhchhia mi 19 an awm tawh thu an tarlang a, mahse an chunga hremna lekkawh dan tur erawh an la sawi chiang lo. Hmeichhiate chu an duh anga zahawm taka inchei thei turin zalenna an tan siam a nih thu thuchhuah an siam bawk.

Tourism chief Ahmed al-Khateeb chuan muslim thawm­hnaw taksa pumpui inkhuh hak chuan ramdang hmeichhiate a huam loh thu a sawi a, an ram bika hmeichhiate tan a nih thu a sawi. Hemi rual hian hmei­chhiate chu thawmhnaw zahawm tak, dar ruak lang lo leh an khup khuh inbel turin an ti thung. Thawmhnaw 'tight' lutuk leh taksa lang tam inbel an remti lo.