UN thuchhuah Egypt-in hnawl

Egypt sorkar laka lungawi lohna lantirte chunga Egypt sorkar chetdan demna chungchanga United Nations High Commissioner for Human Rights (OHCHR)-in thuchhuah a siam chu, Egypt sorkar chuan a pawm loh thu a sawi. 

Kar kal ta Zirtawpni khan eiruk chung changah Egypt president Abdel-Fattah al-Sisi kaihhruai duh lohna chu Egypt khawpui hrang hrangah lantir a ni a, duh lohna lantirte hi tear gas hmanga hnawhdarh an nih bakah eng emaw zat man an ni bawk.

Hemi chungchangah hian UN High Commissioner for Human Rights Michelle Ba­chelet chuan Egypt sorkar chu mipuite zalenna leh mipuite chanvo chu zahsak loah a puh a ni. Nawrh huaihawtte laka a chet dan chu thlak turin Egypt sorkar chu a ngen a ni. 

Hetihlai hian Egypt foreign ministry chuan Bachelet thuchhuah hi information a dawn dik loh vang a ni tiin, Egypt a puhna chu thu dik lo leh belhchian dawl lo a ni, a ti. Egypt mipuiten nawrh an huaihawtna chhan hi Egyptian military contractor hlui Mohamed Ali-a'n online video tichhuak a, Egypt sorkar chu eiru leh mipui chanvo tur sum leh pai dik lo taka hmangah a puh vang a ni. He contractor hi Egypt sorkar chuan an ram aṭangin a hnawtchhuak a ni. 

Egypt president Abdel-Fattah al-Sisi pawhin Egypt sorkar an puhna hi thu dik lo a nih thu a lo sawi tawh a, an rama media mite hnenah pawh hetianga thu dik lo hmanga sorkar puhna hi do let ngam turin a ti.