UN-in Venezuala buaina zirchiang dawn

Venezuala ram tualchhung buainaa inthah, inrukbo leh intihduhdahna thleng nasa nia sawi chu United Nations Human Rights Council chuan a zirchiang dawn.

UN Human Rights Council chuan Venezuala-a mihring dikna chanvo nasa taka palzut a nih chungchang zirchian hi a a pawmpui a, hei hi Venezuala ram ṭhenawmte leh Europe ramten resolution an putluh ngaihtuah a nih hnua an thu­tlukna siam a ni.

Nikum January aṭang khan mi 6,000 vel chu Venezuala-ah hian thah an ni tawh nia sawi niin, hemi chungchangah 'fact-finding mission' kalpui chu UN hian a pawmpui a, hetihlai hian Venezuala palai chuan hei hi US kaihhruaia hmalakna vang a nih thu a sawi thung.

Venezuala hian economic leh political 'crisis' nasa tak a tawk mek a, an ram mipui maktaduai 30 zet, hmun lia ṭhena hmun khat dawn chuan chhawmdawlna an mamawh tawh a ni. UN chuan mi maktaduai li vel zet chu ramdangah inhumhimna zawngin an tlanchhe tawh tih a lo tarlang tawh bawk.

Geneva-a UN Human Rights Council-ah Argentina, Brazil, Chile, Colombia leh Peru-te chuan resolution hi an thehlut a ni. Heng ramte hi Venezuala aṭanga raltlanten inhumhimna an zawnnate an ni hlawm. Venezuelan Ambassador Jorge Valero chuan UN-in mission an kalpui turah hian thawhpui an tum lo tih a sawi thung a, US president Trump-a thusawi pawmah a puh bawk.