China vangin UNSC-in Myanmar demna thuchhuah siam thei lo

Myanmar sipaiten an ram hruaitu hreng a, sorkar thuneihna an chhuhsak chungchangah United Nations Security Council (UNSC) chuan China avangin demna thuchhuah a siam thei lo. 

UNSC hian Thawhlehni khan Myanmar rama thil thleng vang hian emergency meeting a ko a, meeting hi video conference kaltlanga neih niin darkar hnih chhung an sawiho a ni. Mahse UNSC permanent member leh veto nei, China chuan Myanmar sipaite chet dan demna  siam tum chu a thlawp loh avangin joint statement an siam thei ta lo a ni. 

Meeting-ah member 15-te chuan UK-drafted statement chu an sawiho a, United Nations envoy to Myanmar, Christine Schraner Burgener chuan Myanmar sipaite chet dan chu na taka a dem thu sawiin, council member-te pawh Myanmar rama demo­cracy tundin an duhna leh an thlawpna lantir turin a sawm. 

Myanmar sipaiten sorkar thuneihna an chhuhsak chhuanlama nikuma inthlanpui neih chu National League for Democracy (NLD) chak dan a felfai tawk nia an sawi chu finfiahna engmah an nei lo tih sawiin, Burgener chuan sipaiten inthlanpui buatsaih ṭhat leh an tumna pawh thlawp lo turin a ngen. 

Security Council chuan Britain-in statement a siam zulzuiin, sipai chakna hmanga sorkar paihthlak a nih demna chauh ni lo, sipaite chu dan leh thupek zawm a, mihring dikna chanvo neihte zahsak tur leh dan kalha an mi mante chhuah nghal vek tura an phutna chungchanga thuchhuah siam dan tur a ngaihtuah a, mahse thuchhuah siam tur chuan member-ten an pawmtlan vek a ngai a ni. Mahse Myanmar ram ṭhianṭha, China chuan thuchhuah siam tum hi a pawm ve lo a ni. 

A hma pawhin China hian Myanmar sipaite chet dan demna hi engmah a la sawi lo a, sipaiin thuneihna an laksak leh chu cabinet siksawi tih chauhin state media-te chuan an tarlang. 

Sipai chakna hmanga Myanmar sorkar thuneihna chhuhsak a, commander-in-chief Min Aung Hlaing kutah an ram thuneihna hlan a nih hnuah minister leh an deputy 11-te chu thlak nghal an ni. Minister thlak zingah hian finance, health, interior leh foreign affairs minis­ter-te pawh an tel. 

Min Aung Hlaing chuan thuneihna a chelh hnuah Thawhlehni khan cabinet meeting hmasa ber a ko nghal a, meeting-a hian sipai kuta thuneihna lak chu tih loh theih loh a ni tih a sawi nawn leh. 

International Monetary Fund (IMF) chuan kar liam ta khan Myanmar sorkar puihna tur US dollar maktaduai 350 a thawn fel hman chiah a, he sum hi Covid-19 hri leng dona leh ṭul danga a hman tura a tih a ni. 

Mahse ṭanpuina sum a thawnfel hnu lawkah sipaiten thuneihna an chhuhsak a, IMF tan hian a sum pek tawh hi lakkir leh dawn pawhin tihngaihna vak a awm tawh lo nia sawi a ni. IMF thupuangtu chuan Myanmar ṭanpuina sum hi an thawn fel hman tih sawiin, pawisa an thawn thar telin thla sarih liam ta chhung khan Myanmar ram ṭanpuina tur hian USD mtd 700 an thawn tawh tih  sawi. 

IMF-in Myanmar rama a thawhpui hi Central Bank of Myanmar a ni a, finance ministry thununna hnuaiah a awm lo a, mahse Thawhlehni khan sipai sorkar chuan Central Bank governor thar atan Than Nyein a ruat zui nghal a, hei vang hian bank pawh hi sipai thununna hnuaiah hian a awm zui nghal a ni. 

Myanmar sorkar hospital-a thawk ṭhenkhat chuan nimin khan mipui thlan, civil sorkar paithlak leh State Counsellor Aung San Suu Kyi leh  hruaitu dangte man an nih duh lohna an lantir. 

Thawhṭannia sipai chakna hmanga sorkar thuneihna laksak a nih hnua din thar, Myanmar Civil Disobedience Movement chuan hospital 70 leh khaw 30-a medical department-a thawkten lungawi lohna hi an lantir tih sawiin, hospital ṭhenkhatah chuan emergency service tih loh chu an khawih duh lo a, hmun ṭhenkhatah chuan lungawi lohna lantir nan damdawi lama thawktute hian ribbon sen an vuah bawk.