Covid-19 vangin Captain Tom Moore a thi

British army veteran, an rama Covid-19 hri leng dona kawnga hmatawng, National Health Service tana sum tam tham tak tuak chhuaktu, Captain Tom Moore chu Thawhlehni khan Covid-19 vangin kum 100 mi niin a thi. 

Tom Moore chhungte chuan thuchhuah siamin, hun eng emaw chen pneumonia vanga enkawla  nih hnuah Covid-19 a kai tih hriat a nih hnuin Bedfort Hospital-ah dah luh a nih thu an sawi. Damdawi-ina thawkte pawhin an duatin an enkawl ṭha hle tih an sawi a, mahse zual lam pan zelin Thawhlehni khan a thi ta niin an sawi. 

Thuchhuah an siamah an pa, Captain Tom Moore chuan a hun hnuhnung chu hlim taka a hman thu leh, a thiltihte miten ngaihhlut pui em avangin amah pawhin a chak thar phah a, a lo duhthusam leh suangtuah ang ṭhin chu a takin a tawng chho niin an sawi. 

Moore hian nikum April thla kha kum 100 a tling a, kum 100  a tlin hma hian an ram health service-te puala sum tuak nan a huan meter 25-a thui chu vawi 100 kalchhuah tumin a intuk a ni. A kawng a ṭhat tawh loh avangin rollator a hmang tawh bawk. Damdawi lama thawktute puala a thiltih hian ngaihven leh hlutpui a hlawh a, a tirah dollar 1,000 vel tuak chhuah theih a inbeisei laiin, miten an hlutpui tak em avangin dollar mtd 41 zet a tuakchhuak a ni. 

Queen Elizabeth II, prime minister Boris Johnson leh an ram hruaitu dangten Captain Tom Moore an ui thu sawiin, a chhungte hnenah sunna thu an thawn bawk. Captain Moore sunna atan hian Number 10 Downing Street-a an hnam puanzar zar chu a ngul chanve-ah tihhniam a ni bawk.