Amazon CEO ni tawh lo tur Jeff Bezos

Amazon chuan thuchhuah siamin an founder Jeff Bezos chu kumin third quarter-ah hi chuan an Chief executive officer (CEO) a ni tawh dawn lo tih an tarlang. 

Jeff Bezos hi CEO ni tawh loin executive chair a ni tawh dawn thung a, tuna  Amazon Web Services (AWS) CEO ni mek Andy Jassy chu chutih hunah chuan Amazon.com CEO a ni tawh thung ang. Ecommerce giant hian hemi chungchang an puan pah hian nikum fourth quarter-a an sum hmuh chhuah an tarlang tel bawk a, sum pawh an lalut tam hle.

Nikum fourth-quarter-ah khan Amazon hian $tluklehdingawn 125.6 revenue aṭanga an lakluh bakah net income $tld 7.2 an lalut bawk. Kum 57 mi Bezos chuan CEO inthlak­na hun atana hun ṭha tak an hman mek thu a sawi a, Amazon chu thil thar ngaihtuah chhuak tura an dinhmun a ṭhat lai ber a ni tih a lo sawi bawk. 

Khawvela mi hausa ber zinga mi ni mek Bezos hausak zawng hi $tld 197 hu vel a ni a, kum 1994 khan Amazon.com hi online lehkhabu dawr atan a hmu chhuak a, tunah chuan khawvela company hlawhtling ber zinga mi a ni tawh a ni.

"Exec Chair ka nihna angin Amazon hmalakna pawimawh zawng zawngah ka la tel zel dawn a, chutihrual chuan Day 1 Fund, the Bezos Earth Fund, Blue Origin, The Washington Post leh ka nuam tihzawng dangah hun leh tha tam zawk ka seng thei tawh thung ang, tiin thuchhuah a siamah a ziak.

Amazon Web Services (AWS) CEO ni mek Andrew R. Jassy hi National Hockey League-a mi Seattle Kraken neitu zinga mi a ni bawk.

Jeff Bezos-a thachhang dawltu, a rin ber zinga mi niin kum 2006-a AWS kalpui ṭan a nih aṭanga a hma­sawnna kawnga sulsutu pawimawh ber zinga mi a ni. Nikum November thla khan a hausak zawng chu $maktaduai 377 a ni tawh a, tunah hian a nupui fashion designer Elana Rochelle Caplan leh a fate pahnih nen Seattle-ah an cheng mek a ni.