Russia eptu hruaitu Navalny kum 2 chuang tang dawn

Russia-a Moscow court chuan an ram eptu hruaitu, Alexei Navalny kum hnih leh thla riat tang turin a hrem a, pawl leh ram hrang hrangin court thutlukna siam hi an dem thu an sawi nghal. 

Thawhlehni khan Moscow court chuan kum 44 mi, Navalny hremna tur hi a tichhuak a ni. Court thutlukna tihchhuah a ni veleh Britain, France, US leh European Union chuan an dem thu an sawi nghal a, mahse Russia chuan an ramchhung inrelbawl­naa inrawlhah a puh ve thung. 

Navalny thlawptute chuan court thutlukna siam duh lohna lantir leh, jail aṭanga chhuah tir tura phutna lantira nawrh huaihawt chhunzawm zel an tum tih an sawi. Judge Natalya Repnikova chuan kum 2014-a fraud charge vanga kum thum leh a chanve tang tura Navalny hremna lo pek tawh, tihtawp lailawk chu ngaihtuahin a tan hun tlak tur hian a hrem a ni. Hei bakah hian January 17-a Russia rama  a kir hma, Germany rama a inenkawl chhung khan parole-a chhuah tir a nihnaa a intiamkamna te zawm lo a, prison official-te pawh hmu loha puh a ni  bawk. Mahse Navalny chuan Germany-a a awm chhung hian a tan appointment siam theih a ni lo tih a sawi thung. 

2014 fraud case-a thiam loh chantir a nih hnuah Navalny hi hun eng emaw chen house arrest-a hren zui a ni a, judge Repnikova chuan house arrest-a a awm chhung hi jail-a a tan hun turah hian chhiar tel a ni dawn tih a sawi a, kum hnih leh thla riat a tang dawn ta a ni.