China-in Gaza ṭanpui nan USD maktaduai 1 a pe

China chuan Gaza Strip-a Palestinian raltlante ṭanpuina turin Thawhlehni khan UN Relief and Works Agency for Palestine Refugees in the Near East (UNRWA)  nen inremna an ziak a, UN agency hnenah hian US dollar maktaduai khat a pe. 

He inremna hi China Office to the State of Palestine Guo Wei leh UNRWA senior official Marc Lassouaoui-te chuan he inremna hi an ziak a ni. 

UNRWA chuan China sorkarin ṭanpuina a pe chu lawmawm a tih thu a sawi. US-in Palestinian raltlante ṭanpuina sum a pek ṭhin a tihtawp hnuah sum lamah harsatna an tawk chho a, hetihlaia China-in a rawn pui chu thil lawmawm tak a ni, a ti. China ṭanpuina pek chuan Gaza-a mi tam tak, ei tur mamawh tak takte nasa takin a pui thei dawn tih agency aiawha inremna siama hming ziaktu, Mar Lassouaoui chuan a sawi. 

Palestinian raltlante ṭanpui hna thawktu, UNRWA hian sum lamah harsatna an tawk chho nasa hle. Hei hi US president Donald Trump-a’n UN agency hnenah US-in ṭanpuina sum a pek ṭhin a tihtawp vang a ni. Agency hi sum lama a indaih lo chho hle a, budget deficit pawh dollar maktaduai 49 a tling. 

UNRWA hian school 700 chuang an enkawl a, hetah hian naupang zirlai 5,25,000 an nei. Raltlan mtd 3.5-te tan healthcare services a kalpui mek bawk. UNRWA hian Palestine raltlan mtd 5 chuang chhawmdawl hna a thawk mek a ni.