Bus-in Taliban bomb kam a chilpuah vangin mi 32 thi

Afghanistan khawthlang lamah nimin khan civil mite chuanna bus-in Taliban bomb kam a chilpuak a, mi 32 an thi. Thi zinga a tam zawk hi hmeichhia leh naupang an ni. 

Bus hian Kandahar-Heart kawngpuia a tlan laiin Taliban-te bomb kam hi a chil a, mi 32 an thih bakah midang 17-in hliam an tuar tih Farah province thupuangtu Muhibullah Muhib chuan a sawi. 

Mubih chuan bomb hi Taliban firfiakten Afghan leh foreign security force-te beihna tura an kam tih a sawi bawk. Hetihlai hian Taliban lam chuan bomb hi an kam a nih leh nih loh an la sawichiang lo thung. 

United Nations-in Thawhlehnia report a tihchhuahah Afghanistan-ah hian kumin kum chanve chhungin pawikhawihna thlengah civil mi 1,366 an thi tawh a, mi 2,446-in hliam an tuar bawk. Pawikhawihna thlenga thi zat hi nikum hemi hun chhunga thi zat aiin 27% in an tlem a ni. UN chuan thi zat a tlahniam hi a lawmawm rualin, civil mite beihna a la thleng fo chu pawi a tih thu a sawi.