Hong Kong nawrh huaihawttu zinga 44-te thubuai siamsak

Hong Kong-a Pathiannia nawrh huaihawt leh buaina chhuak kaihhnawihah police-te chuan mi 44 thubuai an siamsak. Thubuai siamsak zinga 10 chuang hi zirlai an ni. 

Pathianni khan Hong Kong-ah hian nawrh huaihawt a ni leh a, nawrhna hmunah hian buainate a chhuak zui a ni. Buaina chawkchhuaka puha thubuai siamsak, mi 44 zinga 43-te chu nimin khan Eastern Magistrate Court-ah hruai an ni a, judge chuan bail-a chhuah an dilna chu a lo pawmsak. Hetihlai hian an zinga pakhat chu court-ah hian a inlan ve lo a, court chuan manna tur thupek a tichhuak nghal. 

Police-te chuan lungawi lohna leh democracy thlawpna lantira nawrh huaihawtna a buaina chhuaka mawhphurtu zinga a puh, mi 20 chuang chu nimin khan thubuai an siamsak leh a ni. Hun eng emaw chen chu Hong Kong-ah han kartin, kartawp apiangin nawrh huaihawt a ni ṭhin a, Hong Kong inrelbawlnaa China inrawlh an duh loh thute an sawi. Hong Kong hotu Carrie Lam leh a kaihhruai sorkar chu bang turin an nawr. 

Nimina thubuai siamsakte hi kawngdang, inhungna bang tichhia, street sign tichhia leh police officer-te leirawhchan leh iron rod hmanga beiah puh an ni.