Myanmar sipaiten Facebook an block Police-ten Suu Kyi-i thubuai siamsak

Myanmar-a mipui sorkar thuneihna hnehchhuhtu, sipai sorkar chuan nimin aṭang khan Facebook leh social media platform dangte a block a, sorkar paihthlak duh lohna lantira Mandalay khawpuia nawrh huaihawt zinga mi pathum man an ni bawk. 

Myanmar ram mipui makta­duai 53 zinga a zahve deuhthaw hian Facebook hi an hmang a, Thawhṭannia sipai chakna hmanga sorkar paihthlak a nih pawh khan eptu lam chuan lungawi lohna lantirna hmanrua ber atan an hmang a, civil disobedience campaign pawh  Facebook kaltlang hian an nei zui nghal a ni. 

Ministry of Communication and Transport chuan social media platform-te khuahkhirhna hi February 7 thleng kalpui a ni dawn tih a tarlang. Block a nih chhan hi sawifiahin, "Mi tam takin ramchhung boruak tihchhiat tumin, thu dik tawk lo thehdarhna atan an  hmang a, hei vang hian Facebook hmangtu mi tam tak rilru an tihbuai phah a ni," a ti. 

Myanmar police-te chuan sipaiten a thuneihna an hnehchhuha an hren zui, Aung San Suu Kyi-i chu dan kalha ram pawn aṭanga inbiakpawhna hmanruate lakluhah puhin thubuai an siamsak a, February 15 kawl an dil. 

Nilaini khan police chuan court-ah kum 75 mi, Suu Kyi-i an puhna chungchang kimchang hi thehlutin, an ram khawpui Nay Pyi Daw-a a chenna in an dapnaah walkie-talkie radio an man thu an tarlang. Heng radio-te hi dan loa lakluh niin, phalna nei loin Suu Kyi hian a hmang niin an puh. He thubuaiah hian thiam loh chantir a nih chuan kum thum thleng jail tantir theih a ni ang. 

Suu Kyi hi Thawhṭanni khan sipaiten an man a, a chenna inah pawn chhuak thei loa hren zui nia sawi  ni mah se man a nih hnu hian a hmel emaw, thlalak emaw pawh hmuh tur a la awm lo a ni. Sipaiten Suu Kyi-i ruala an man, president Win Myint pawh National Disaster Management Law hnuaiah nikum election campaign laia Covid-19 restric­tion palzuta anmahni thlawptute nena meeting buatsaihah puh a ni bawk. 

Nimin khan Mandalay khaw­puiah sipaite chet dan duh lohna lantir a ni. Hei hi sipaiten sorkar thuneihna an hnehchhuh avanga lungawi lo a, street protest neih hmasakna ber nia sawi a ni. 

Nawrh huaihawtte hian sipai chakna hmanga sorkar thuneihna chhuhsak an duh lohna thuziakte an keng a, hruaitu mante chu chhuah tura an phut thu an aupui bawk. Police-te chuan nawrh huai­hawtte hi hnawt darhin, an zinga pathum chu an man zui a ni.