US-in Russia nena Nuclear chungchanga an inremna pawtsei
US president Joe Biden thuneihna hnuaia awm US sorkar chuan Nilaini khan US leh Russia-in nuclear chungchanga inremna an siam chu kum nga dang atan a pawtsei a, hei hian ram pahnih inkara ralthuam siam kawnga intlaksiakna awm theih chu a pumpelh tir an beisei thu an sawi bawk.
US leh Russia-in Nuclear treaty an siam hi a tawp hma ni chiahah an pawtsei leh a ni. US Secretary of State Antony Blinken chuan an inremna tawp hma ni chiahah United States chuan New START chu kum nga dang atan a pawtsei leh a ni, a ti.
"President Biden chuan America mipuite chu nuclear buaina laka humhim a tiam a, hemi atan hian arms control leh nonproliferation-a hmahruaitu US a nihna chu a tinung thar leh a ni," tiin thuchhuah a siamah a tarlang.
Russian president Vladimir Putin chuan Zirtawpni khan he inremnaah hian a hming a lo sign tawh a, US pawhin pawhsei a pawm ve leh takah chuan kum 2010-a Barack Obama-in Russia inremna a lo ziahpui tawh chu February 5, 2026 thleng atan pawhsei a ni leh ta a ni.