Netherlands leh Switzerland-in UNRWA fund titawp
Netherlands leh Switzerland chuan Palestinian raltlante chhawmdawl hna thawktu, United Nations Relief and Works Agency (UNRWA) hnena sum an pek an titawp.
Ram pahnihten sum pek an tihtawp chhan hi agency-a sum tichingpen leh thuneihna dik lo taka hman a awm ṭhin vang nia sawi a ni.
Al Jazeera chuan UNRWA chungchang a chhuichianna report a lo tichhuak tawh a, agency chhunga dik lo taka thiltih dan, hna pek chungchanga induhsak bikna leh inthliarhranna awm ṭhin chungchangte a tarlang. Report hi nikum December thla khan UN Secretary-General Antonio Guterres hnenah thawn a ni a, chhui chian mek a ni.
Dutch Ministry of Development Cooperation chuan UN leh UNRWA hnenah report chungchang hi sawifiah tura an ngen thu a sawi a, donor dangte pawh an biak thu a tarlang bawk. Dutch minister of development cooperation Sigrid Kaag chuan UN-in hma lak a tum dan pawh hriat an duh thu a sawi.
Switzerland foreign ministry chuan UNRWA hnenah kumtin atana sum an pek ṭhin, US dollar maktaduai 22.5 chu an pe fel tawh tih a sawi a, mahse agency hnena ṭanpuina dang pek tur erawh chu an pek chhunzawm tawh dawn loh thu a sawi ve bawk.
UNRWA thupuangtu Tamara al-Rifai chuan Switzerland leh Netherlands-te thutlukna siam dan chu pawi an tih thu leh, agency puhna chungchang chu chhui mek a ni tih a sawi. Inpuhna ringawt a ni a, thil chiang engmah hriatfiah hmaa hetianga thutlukna an siam mai chu a pawi tih sawiin; chhui chian hna zawhfel hun nghak phawt se a duh tih a sawi bawk. Hemi rual hian donor dangte chu Palestinian raltlante chhawmdawlna tura sum pe chhunzawm zel turin a ngen.