Suu Kyi thawhpui hnai man belh leh

Myanmar sipaite chuan nimin khan Aung San Suu Kyi-i thawhpui hnai leh pawimawh tak, Win Htein chu an man ve leh. 

Kum 79 mi, Win Htein chuan man a nih thu hi sawiin, nimin khan police officer-te chuan Yangon aṭangin Nay Pyi Daw an panpui a, eng thubuai nge siamsak a nih dawn tih a la hre lo tih a sawi. Thawhṭanni khan Myanmar sipaite hian State Counsellor Suu Kyi leh president Win Myint-te an man a, sorkar thuneihna an hnehchhuh zui a ni. 

Suu Kyi-i party, National League for Democracy (NLD) Parliament member eng emaw zat chu Parliament compound-ah hren zui an ni bawk. Nimin kha NLD MP 70 vel chuan sipaite thu zawm loin, Parliament inkhawm an nei lui a, an ram mipuite tana thawk zel turin an intiam a ni. 

Nimina man tak, Win Htein hian man a nih hmain sipai chakna hmanga civil sorkar thuneihna hnehchhuh a ni a finthlak lo hle nia a ngaih thu leh, sipai hotute chuan an ram chu kawng dik lo  lamah an hruai niin a sawi a ni. An ram mipuite chu sipaite chetdan theihtawpa dodal turin a fuih bawk a ni. 

United Nations Security Council (UNSC) chuan  Ningani khan thuchhuah siamin, Myan­mar sipaiten ram puma state of emergency an puang chu ṭha lo an tih thu leh, Aung San Suu Kyi leh political leader dang an hren mekte chu chhuah tura an phut thu a tarlang. 

Member 15 awmna, khawvela pawl thiltithei bera ngaih, UNSC hian Myanmar rama civil sorkar paihthlak a nih aṭanga ni thum hnu, Ningani khan Myanmar chungchanga thuchhuah hi an siam thei chauh a ni. Security Council member-te chuan Myanmar rama democracy a din theihna tura thlawp zel a ṭul thute sawiin, human right, fundamental freedom leh rule of law te zah turin an ngen bawk.