US-in Yemen-a beihpui thlak thlawpna titawp dawn

US President thar Joe Biden chuan US sorkarin Saudi Arabia kaihhruaia Yemen rama Houthi hel laka beihpui thlak a thlawpna chu a titawp dawn. 

National security adviser, Jake Sullivan chuan White House-a chanchinthar lakhawmte a kawmnaah President Biden chuan US chu inbiakna hmanga buaina leh indonate titawpa hma la nasa zawk turin a duh tih a sawi a, inthlan dawna a campaign au hlaa Yemen tualchhung buaina titawp tura hma lak a lo tiam tawh chu a tihlawhtling dawn a ni, a ti. 

President Biden chuan Ningani tlai  khan Yeman rama beihpui thlakna an thlawp tawh dawn lo thu a puan rualin, Yemen rama special envoy atan Timothy Lenderking a ruat thu a puang nghal bawk. Saudia Arabia kaihhruaiin Gulf ramte chuan kum 2015 aṭang khan Yemen-a Houthi hel lakah beihpui an thlak a ni. US President hlui, Barack Obama hunlai aṭang khan he beihpui thlakna hi US chuan a lo thlawp tawh a ni.