US-ah inpawngkahna ṭum hnih a thleng Mi 29-in nunna an chan

US-a state pahnihah darkar 24 chhungin inpawngkahna ṭum hnih a thleng a, mi 29-in nunna an chan a, hliam eng emaw zat an awm. 

Texas, US-a EL Paso khuaah kar kal ta Inrinni khan mi pakhatin bazar hmunah assault rifle hmangin mi a pawng kah a, mi 20 an thi a; midang 26-in hliam an tuar. Thuneitute chuan pawih-khawihna thlenna hmun, Mexico border checkpoint aṭanga km riat vela hla, Cielo Vista Mall bula Watmart dawr kawtah pawikhawihtu hi man nghal a nih thu an sawi.

Police-te chuan inpawngkahna thlen lai hi Walmart dawr lun lai tak a ni a, mi 3,000 vel zet an awm tih an sawi. Police-ten an man hi Allen, Texas ami, Patrick Crusius (21) a ni. Pawikhawihtu hi thu zawhfiah mek a ni a, midang inhnamhnawih an awm lo nia a lan thu police-te chuan an sawi bawk. Police-te chuan pawikhawihtuin a hmaa online message a lo post nia sawi chu an chhui chiang mek bawk a, he thu a post-a hian US-a pemlutte leh Latino ho huatna thu te, US mi leh sa dik takte hna thawh tur chhuhsaka puhna thute a chuang. 

El Paso khua hi West Texas-a awm a ni a, mi 680,000 vel an cheng a ni. Juarex, Mexico nena inri a ni a, he khuaa cheng zinga 80% chuang chu Latino leh Mexican citizen an ni.