Singapore-ah opposition party thar a ding

Politician leh medical doctor pension Tan Cheng Bock chuan Inrinni khan political party thar Progress Singapore Party (PSP) a din. 

Party thar hi prime minister Lee Hsien Loong nau, Lee Hsien Yang pawhin a thlawp. PM leh a nau hi rokhawm chungchangah kum 2017 khan vantlang hriatah nasa takin an lo intithiam lo tawh a ni. Tan Cheng Bock chuan an party hian kum 2021-a Singapore general election neih turah, sorkar lai People's Action Party (PAP) chu paihthlak ngei tumin an bei dawn a ni, a ti.

"Sorkar chuan a tihdan hmang a thlak tawh a, hmasawnna lak aṭangin a kalpeng tawh a ni. A chhan chu sorkar ṭha nei tura thil pawimawh pathum - langtlang, zalenna leh mawhphurhnate sorkar hian a hnungchhawn tawh vang a ni," tiin Tan chuan an pawl dinchhan a sawi. Tan hian PAP hi kum 2006-ah a chhuahsan a. A chhuahsan hnu hian Singapore-a sorkar kal dik lo sawisela khalhngil tura huhang neilian ber a ni.

Singapore politics kalphung hi chhungkaw pakhatin ro a rel ang deuh a ni. Kum 1950 khan Lee Kuan Yew-a'n People's Action Party (PAP) chu a din a, he party hian independence an hmuh aṭanga vawiin thlengin 60% vel vote hmu ziahin, rorelna fung an la chelh thei.