Cambodia : Khmer Rouge hruaitu Nuon Chea a thi

Cambodia rama Khmer Rouge in rawng taka ro a rel laia an pawl hotu pahnihna, "Brother Number Two" Nuon Chea chu kum 93 mi niin a thi. 

Nuon Chea hi mi tam tak suatna leh a mihring puite laka pawikhawihna lian tak thlena puhnaa thiam loh chantirin dam chhung tang tura hrem a ni a, kum 2007 khan man a ni. 

Extraordinary Chambers in the Courts of Cambodia (ECCC) thupuangtu, Neth Pheaktra chuan Nuon Chea thih thu hi a sawi a, a thihna chhan erawh a sawilang lo. Kumin July thla tir lam aṭang khan Chea hi damdawiinah enkawl a ni. A ruang hi Pailin province-ah vui turin lak a ni ang. 

Kum 1975 - 1979 chhung khan Cambodia ramah hian Pol Pot-a kaihhruai Khmer Rouge in ro an rel a, an rorel chhung hian mipuite lakah an che rawng hle. Hnathawka an chhawr nasat avang leh ei leh in tur nei mumal loh vanga thi leh, anmahni dodaltu an tihhlumte hi maktaduai hnih vel zet an tling. 

Nuon Chea hi Khmer Rouge thuthlung duangtu ber nia sawi ṭhin a ni. Kum 1979-a Vietnam-in an run a, Khmer Rouge rorelna paihthlak a nih khan Nuon Chea hi tlanchhiain a biru zui a, mahse kum 1998 khan inremna thuthlung an siam hnuah sorkar chuan a ngaidam a ni. Hetichung hian ramdangten an nawrna avangin kum 2007 khan Cambodia sorkar chuan a man a,  head of state hlui Kieu Samphan nen thubuai rip tak siamsakin thiam loh chantir an ni zui ta a ni.