South Korea leh US-in annual war game nei

South Korea leh United States te'n kumtina an neih ṭhin, indo nunchan zirna joint annual war game chu nimin aṭang khan an nei leh ṭan.  

North Korea chuan he war game hi na taka do­dal nghalin, US nena nuc­lear diplomacy an neih chungchangah pawh nghawng a nei ang tih an sawi.

SKorea defence minis­try thupuangtu Choi Hyun-soo chuan, "War game neih chhan hi indo lo thlen thut hunah South Korea khawpui Seoul chu Washington aṭangin an sipaiten a rawn thunun thei dawn em tih enfiahna a ni," a ti.

NKorea chuan SKorea-US military drill neih ṭhin hi a ngaimawh thei hle a, an ram beihna tura inbuatsaihna angah a ngai. SKorea leh US-in drill an nei a nih chuan nuclear chungchanga an inbiak ṭhinna chu tih tawp a ni ang a, missile kap thui thei tak tak an test ṭhin pawh chhunzawm a ni ang, tiin Kim Jong-un chuan nikum khan a lo sawi lawk tawh a ni.

Kar hmasa khan NKorea chuan short-range missile pahnih a enchhin leh niin South Korea sipaite chuan an sawi. Hei hi NKorea hotu Kim Jong-un leh US president Donald Trump-ten nuclear ralthuam tibo tura inbiakna neih leh an remtih hnua NKorea-in missile a enchhin lehna hmasa ber a ni.  

Kumin June thla khan Kim Jong-un leh Donald Trump te chu Korea ram pahnih ṭhentu, demilitarised zone-ah an inhmu a, DMZ a nuclear ralthuam tihbo dan chungchang ngaihtuaha inbiakna neih chhunzawm pawh an lo remti tawh a ni. 

SKorea chu a ṭhenawm ram te laka chhanhim turin US hian a pui a, a sipai 28,500 an awm mek a, a tam zawk chu Pyeongtaek-a Camp Humphreys hmunah an awm a. US-in ramdanga a sipaite a dah tamna ber a ni bawk.