2019 chhungin US-in Afghanistan-ah bomb 7,423 tipuak

Kum 10 chhunga kum khat a US-in Afghanistan-a bomb a tihpuah tam ber ṭum chu nikum kha niin, nikum chhung khan US-in Afghanistan-ah bomb 7,423 a tihpuah thu US Air Forces Central Command (AFCENT) chuan a tarlang.

Nikum hmasa nena khaikhin chuan bomb tihpuah zat hi 61-in a tam a, kum 2018 khan Afghanistan-ah US-in bomb 7,362 a tipuak a ni. Barack Obama US presi­dent a nih lai, kum 2009 khan Afghanistan-ah bomb 4,147 tihpuah a lo ni tawh bawk. Kum 2016-a president Donald Trump thlan tlin a nih aṭang khan US sipaite hian van lam aṭanga bomb hmanga beih hi an uar sawt hle a ni.

US hian Afghanistan sipai­te nen ṭangkawpin Afgha­nistan-a firfiakte beihna kawngah vawiin thleng hian hma a la zawm reng a ni. Pathianni khan Balkh province-ah bomb hmanga inbeihna avang bawkin civil mi 7 an thi leh a, tun thla chhung ringawtin civil mi 60 chuang Afghanistan-ah hian thi leh hliam an awm leh hman der tawh a ni. Hei hi a chhan chu US-in Afghanistan-a Herat province, Farah Province, Nimruz Province-ah leh hmun hrang hranga Taliban firfiakte a beihna kawnga civil miten an lo tuar palh ve vang a ni deuh ber. 

Nikum October thla khan US-in Taliban drug laboratory eng emaw zat chu bomb hmang bawkin a bei leh a, kha thil thlengah khan civil mi 30 vel an thi. Nikum kum chanve chhung khan civil mi 717 an thi a, kum hmasa nena khaikhin chuan 31%-in thi zat hi an tam tih UN chuan a tarlang.