Iraq: Yazidi community-te'n IS-in an thah mi 104 an phum

Iraq hmar lama awm Yazidi community-te chuan Inrinni khan Islamic State (IS) hran vanglai kum 2014 vela an mi thite ruang 104 an phum.

Yazidi community-te hian an chi leh kuang IS-in an thah tak, thlanmuala a hlawma an phumte chu phawrh lehin tute nge an nih an hriat theihte chu Ninevah province-a Mount Sinjar bula Kocho thingtlang khuaah a rualin an phum leh a ni.

IS-in beihpui an thlak tuar bertu zingah khan Yazidi community-te hi an tel a, mipa sang chuang an thah sak bakah hmeichhe leh naupang tam tak an man a, hmeichhe tam tak an pawngsual bawk. Inrinnia an phum ruang 104-te hi mipa ruang vek a ni a, kum 2014 August thlaa IS firfiakin an thahte kha niin Yazidi Organisation for Documentation hotupa Khairi Ali Ibrahim chuan a sawi.

Kocho-a ruang an letpui hma hian Baghdad-a  Unknown Soldier memorial-ah vuina hun an hmang hmasa a, ruang an dahna kuang zawng zawngah hian an thlalak an dah tel vek bawk. IS-in Iraq an run hma khan Iraq-ah hian Yazidi mi 5,50,000 an awm nia chhut niin IS-in beihpui an thlak avang khan Yazidi 3,60,000 vel chu ramdangah himna zawngin an raltlan a ni.