Syria sipaite'n hel hmun pawimawh an lalet

Syria sipaite chuan nimin khan an ram hmarthlang lam Idlib province-a hel hmunpui Maarat al-Numan chu an lalet tih an sawi.

Sipaite hian Maarat al-Numan bakah hian Idlib khawpui hmar lama awm thingtlang khuate chu khaw­pui tenau deuhte pawh eng emaw zat an lalet tih an sawi bawk. Maarat al-Numan khawpui hi Thawhlehni zanah khan an luhchilh a, nimin khan a pumin an lalet ta tih hi an puang a ni.

Thuchhuah an siamah sipaite chuan Syria ram chhunga firfiakte ram lak zawng zawng chu an lalet leh vek dawn tih an sawi a, Maarat al-Numan an lakletna chu 2018-a Russia Sochi-a inremna an ziah tihpuitlinna tura Hama-Aleppo kawng firfiak kut aṭanga an lakletna tura an hmalakna pawimawh tak pakhat a nih thu an tarlang.

Russia Sochi-a inrem­na an ziahah hian an ram khawpui Damascus kawng thlenna tura kawng pawi­mawh Aleppo neih letna turte pawh a tel a ni.

Hama-Aleppo kawngpui hi firfiakte'n an thunun avang hian Aleppo kal tur hian kawng kual zawk an zawh a ngai ṭhin a, hei hian khualzin leh official thila zinte chu harsatna nasa tak a thlen ṭhin.