Israel-in West Bank-a in 2,304 sakna tur pawm

Israel sorkar chuan Palestinian ram a luah, West Bank-a Juda-te chenna tur in 2,304 sak belhna a pawm. Hei hi kum 2017 hnua ṭum khata in sak tur a pawm tam ber ṭum a ni. 

NGO Peace Now chuan thuchhuah siamin, Israel Higher Planning Committee chuan ni eng emaw zat meeting an neih hnuah, in sak a pawmpuina hi a tichhuak tih a sawi. Peace Now chuan West Bank-a Juda-te in sak tur pawm leh hian Israel leh Palestinian inkara remna leh muanna a awm theihna leh, state pahnih dinna tura hmalaknate chu a tichhe thei dawn a ni, a ti.

Israel prime minister Benjamin Netanyahu chuan kumin April thlaa inthlanpui an neih dawn khan West Bank-ah Juda-te chenna turin colony luah belh alo tiam tawh a ni. Israel hian kum 1967 aṭangin West Bank leh East Jerusalem hi a luahsak tawh a, Juda-te chenna tur hi hmun 100-ah siamin, mi nuai 6.5 vel an cheng mek a ni.