Pakistan-in India palai hnawtchhuak India nena insumdawn tawnna titawp

Pakistan sorkar chuan an rama In­dian ambassador, Ajay Bisaria chu a hnawtchhuak. India rama Pakistan palai pawh koh kir a tum a, India nena an insumdawn tawnna pawh a titawp bawk.

Central-a BJP kaihhruai National Democratic Alliance (NDA) sorkarin Au­gust 5-a Jammu and Kashmir special status pekna, Article 370 a titawp chu Pakistan hian na takin a sawisel a, he thil hian ram pahnihte inkar boruak pawh a tihchhiat zual phah theih thu a lo sawi tawh a ni. 

Nilaini khan Pakistan prime minister Imran Khan-a kaihhruaiin National Security Committee (NSC) session neih a ni a, hei hi kar khat chhunga ṭum hnih an neihna a ni. Session-ah hian India sorkar thiltih dan leh, Kashmir chungchangte an ngaihtuah ho a ni.

Meeting zawha thuchhuah a siamah, NSC chuan India nena palai intirh tawn te, insumdawn tawnna te chu tihtawp a, hemi chungchang pawh hi UN-a thlen te leh, August 14-a Pakistan In­dependence Day hman tum tur Kashmir mipuite an thlawpna lantirna atana hman a nih thute an tarlang. August 15 chu Black Day-ah hman an tum bawk. 

Pakistan leh India hian an inpalai tawnna hi kum 1965 leh 1971 khan a lo titawp tawh bawk a, an staff te pawh an ko kir dun vek a ni. Pakistan PM Imran Khan chuan Jammu and Kashmir special status pek tihtawp chuan Pulwama pawikhawihna thleng ang kha a thlen leh theih thu sawiin, hei hian ram pahnihte inkarah indona pawh a chawk chhuak thei dawn a ni, a ti. J&K chunga India sorkar thiltih danah, Kashmir mipuite tan khawvel chuan aw a chhuah a ngai a ni, tiin a sawi.

Pakistan hian nimin khan India nena an inkara rel service, Samjhauta Express pawh a titawp nghal bawk. Pakistan federal railway minister Sheikh Rashid Ahmed chuan rel service tihtawp a nih thu hi nimina press conference a neihah a sawi a, railway minister a nih chhung chuan Samjhauta Express rel hi tlantir a ni tawh lo ang, a ti. Minister chuan thla thum thla li chhung chu hun pawimawh tak an hmachhawn dawn tih sawiin, indo pawh chhuak thut thei a nih thu a sawi. Samjhauta Express train service hi ram pahnihten Simla Agreement an siam hnuaiah, kum 1976 July 22 aṭang khan tlan tir ṭan a ni. He relah hian sleeper coach paruk leh AC tier-coach pathum a awm. Delhi-Attari leh Lahore-Wagah ah tlantir ṭhin a ni. 

Sorkar laipuiin Article 370 a tihtawp avanga buaina a chhuah venthawn thilah, Jammu and Kashmir-ah venhimna khauh taka kalpui zel a la ni. Pathianni zan aṭangin internet leh mobile service te tihtawp a la ni a, mipui punkhawm khapna thupek pawh hman a la ni. 

Internet leh mobile service te tihtawp a nih avangin J&K-a chengte tan radio leh outstation television channel-te chu chanchin an hriat theihna a la ni rih. Khawchhungah outstation television channel report-te chauh hmuh an ni lo a, local reporter te hmuh tur an awm lo. Reporter awmte pawh hi secruity force-ten an vil reng nia sawi a ni bawk. 

Hetihlai hian J&K Governor Satya Pal Malik chuan boruak awmdan chu thlirin, a lungawi thlak niin a sawi thung. Nilaini khan governor hian Raj Bhavan-ah Article 370 tihtawp a nih hnua J&K-a dan leh thupek dinhmunte thlirin meeting a ko. He meeting-ah hian advisor to governor K Vijay Kumar leh K Skandan, chief secretary BVR Subrahmanyam te an tel. Governor chuan thil duhawm lo thleng lian tham a awm lo tih sawiin, hospital-ah emergency service pawh kalpui vek a ni a, mipuite pawh an mamawh lamin an chhuak a, tui leh electric supply pawh a ṭha tawk a ni, a ti. Ei tur pawh chhekkhawl ngah tawk a nih thu a sawi. 

J&K chief miniser hlui Omar Abdulla leh Mehbooba Mufti, Peoples Conference chairman Sajad Lone-te chu house arrest-a hren chhunzawm an la ni a, police-te chuan MP leh National Conference patron Farooq Abdullah pawh an hreng leh bawk nia sawi a ni. 

J&K political party liana MLA leh cabinet minister hluite ho dinhmun erawh hriatchian a ni lo.