Venezuela President-in inbiakna chhunzawm duh lo

Venezuela President Nicolas Maduro chuan eptu pawl aiawhte nena inbiakna neih tur chu titawpin, sorkar aiawh palai a tir duh lo. 

President Maduro chuan Nilaini khan thuchhuah siamin, nimin aṭanga Barbadors-a eptu pawl aiawhte nena inbiakna neih tura ruahmanna an lo siam tawhah, sorkar aiawh turte chu kal lo turin a ti a ni. Maduro-an thuchhuah a siam chhan hi US-in Venezuela sorkar hrekna a siam vang a ni. 

Thawhṭanni khan US Presi­dent Donald Trump chuan Vene­­zuela sorkar bungraw neih zawng zawngte chu khawih chet theih loha hrekna a siam a, bungraw inthawn kual pawh a khap tel bawk. US hrekna siam hi Venezuela sorkar chuan na takin a sawisel a, mimal thila inbeihnaah an puh. 

Venezuela tualchhung politics buaina awm mek chin­fel dan ngaihtuahin, July thla aṭang khan sorkar aiawh leh eptu pawl aiawhte hian Barba­dos-ah meeting an nei ṭan a, nimin leh vawiin-ah meeting hi chhunzawm leh turin an ti a ni. Mahse Maduro-an sorkar aiawhte tel a remtih tak loh vangin, eng angin ngen inbiakna hi kalpui a nih zel dawn hriat a ni tawh lo. 

Kumin January thla khan eptu pawl hruaitu, Juan Guaido chuan inthlanpui neihah Maduro thlan tlin a nih danah thil dik tawk lo a awm tih sawiin, amah chu Venezuela 'interim presi­dent' a inpuang. Hei hi US leh ramdang eng emaw zatin an pawmpui bawk.