US-in immigration raid nei Latino worker 680 man
US immigration official-te chuan Nilaini khan an ram chhim lama awm Mississippi state-a meat processing plant pasarih dapin mi 680 vel zet an man.
An mi mante hi Latin America mi an ni tlangpui a, Nilaini-a immigration raid an neih hi kum 10 chhunga helam hawia beihpui an thlak len ber ṭum a ni. Nilaini-a president Donald Trump-a'n inkahna thlenna hmun El Paso, Texas a tlawh hnu lawkah khan beihpui hi thlak a ni a, demtu an tam hle.
Coalition for Humane Immigrant Rights executive director Angelica Salas chuan ramchhunga rilru nate hnemna thu kan sawi niah president Trump chuan chhungkaw tam tak a ṭhendarh a ni, tiin a dem thu a sawi. Donald Trump hian an ramchhunga dan loa awmte hi a ngaimawh hle a, South America aṭanga dan loa lutte chu 'criminal' tiin a sawi hial a ni.
US Immigration and Customs Enforcement (ICE) chuan Nilainia beihpui an thlak hi thla khat liam ta vel aṭanga an ruahman tawh kha a ni tih sawiin, an beihpui thlaknaah pawh hian agent 600 vel zet an tel. ICE agent-te hian hnathawkte hi an tlanchhiat lohna turin company panga zet chu hual betin hnathawkte hi an man a ni.
An mi mante hi military hangar-ah hruaiin dan loa ramchhunga luh thubuai an siamsak ang. Nilainia-a beihpui an thlak hian chhungkaw 70 vel a nghawng tih thuthar thehdarhtute chuan an tarlang.