Kyrgyzstan sipaiten president hlui Atambayev chenna luhkhung

Kyrgyzstan security force-te chuan Nilaini zanah khan an president hlui Almazbek Atambayev chu man tumin a chenna in an luhkhung.

Security force-ten Atam­bayev chenna in an luhkhung tur hi Atambayev thlawptute chuan lo dangin an innekbuai zui a, silai puakah officer pakhat a thi tih official-te chuan an sawi.

Almazbek Atambayev hi eiru-a puh niin, parliament chuan June thla khan hrem theih loh a nihna a hlihsak tawh a ni. Kyrgyzstan national security committee (GKNB)-te chuan rubber bullet chiah keng special force-ten president hlui chenna in hi an luhkhung tih an sawi a, mahse amah thlawptute hian silai pangngaiin an lo kap let tih an sawi a ni.

Kyrgyzstan health ministry chuan Nilaini zana buaina chhuakah hian mi 36 an hliam tih an sawi ve bawk. Tualchhung thuthar theh­darhtute chuan Atambayev thlawptute hian sipai paruk an man tih an tarlang a ni.