Pakistan eptu hruaitu Maryam Nawaz an man

Pakistan eptu hruaitu leh prime minister hlui Nawaz Sharif-a fanu, Mayram Nawaz chu nimin khan man a ni. 

Pakistan Muslim League (PML-N) vice president Maryam Nawaz-i hian Lahore-a Kot Lakhpat Jail-a tang, a pa Sharif tlawh tura a kal chu National Accountability Bureau (NAB) lamin an lo man tih PML-N thupuangtu chuan a sawi. Man a nih chhan hi hrilh an ni lo tih an sawi bawk. 

Mahse NAB chuan kum 45 mi, Maryam hi Chaudry Sugar Mills case ah man a ni tih sawiin, dik lo taka sum laluta puh a nih thu a sawi. Man a nih hnu hian Lahore-a NAB headquarters-ah hruai nghal a ni. 

Maryam hi a pa leh a pasal nen nikum khan Avenfield corruption case-ah man an ni a, mahse an pathum hian bail-a chhuahtir a ni. Chhuah an nih hnu lawkah a pa hi Al Azizia Steel Mills case-ah man a ni leh a, Lahore-ah tantir a ni.