Myanmar-ah Nawrh huaihawt chhunzawm zel

Myanmar sipaiten sorkar thuneihna an hnehchhuh leh, Aung San Suu Kyi leh sorkar hruaitu dang an man avanga lungawi lohna lantirin nimin khan Yangon-ah a zawna ni thumna atan nawrh huaihawt chhunzawm leh a ni. 

Yangon kawtthlera lungawi lohna lantira pungkhawmte hi an tam tham hle a, Suu Kyi leh midangte chu chhuah an phut thute an aupui. Pungkhawmte hian “Say no to dictatorship” leh “We want democracy” tih thuziakte an keng a, Buddhist flag bakah Suu Kyi-i party, National League for Democracy (NLD) banner te an keng bawk. Kawng zawhnaah hian Buddhist monk-ten hma an hruai. 

Nimina nawrh huaihawtah hian nurse, zirtirtu leh sorkar hnathawkte an tel niin local media-te chuan an tarlang. Activist-te chuan sorkar hnathawkte chu sipai rorelna paihthlak a nih theihna tura an hna thawk chhunzawm rih lo turin an ngen. 

Kawngzawh hi Yangon bakah Myanmar khawpui, Nay Pyi Daw, Mandalay, an ram chhimchhak lam khawpui Dawei leh Kachin state khawpui, Myitkyina-ah te neih a ni bawk. Nay Pyi Daw-a kawngzawhte chu police-ten hnawhdarh nan water cannon in an phuh a, hliam tuar eng emaw zat an awm. 

Sipai sorkar chuan kar liam ta Inrinni khan an rama internet service chu a titawp leh a, mahse Pathianni khan service hi tihnun leh nghal a ni.