Court-ah Israel PM Netanyahu inlan

Israel prime minister Benjamin Netanyahu chu eirua puh a nih chungchangah nimin khan court-ah a inlan leh. 

Israel PM dinhmun chelh laia thubuai siamsak hmasa ber, Netanyahu hi kum 2019-a a ṭhian mi hausa tak tak hnen aṭanga thilpek hlu tak tak dawngah leh, hemi avang hian sorkar kaihhnawih thilah an laka duhsakna nasa taka lantir letah puh a ni a, nikum khan thubuai hi siamsak a ni. Mahse Netanyahu chuan an puhna te hi thu dik lo niin a sawi thung. 

Kum 71 mi, Netanyahu chuan an puhna chungchanga a chhanna hi a thehluh thu Jerusalem District Court-a judge pathum awmna panel hnenah a hrilh. Prime Minister hian thubuai a hmachhawn mek lai hian kumin March 23-ah an ram inthlanpui neih a ni leh dawn. Hei hi kum hnih chhunga inthlanpui an neih ṭum lina tur a ni. 

Nikum April thla aṭanga tangrual sorkar siamtu, Likud party leh Blue and White Party-te chu state budget chungchangah an inthurual thei lo a, budget pass theih hun tawpah pawh inremna an siam theih tak loh avangin nikum December thla khan Israer parliament, Knesset chu ṭhiatin inthlan ṭhat hi a ngai leh ta a ni. 

Netanyahu chuan inthlanpui buatsaih leh a ngaih lohna turin theihtawp an chhuah a, mahse Blue and White party hotu, Benny Gantz chuan inremna a lo siampui tawh te chu zawm theih a nih tak loh avangin, loh theih loha inthlan an hmachhawn leh a ngai niin a sawi. Mahse state budget chungchanga an inrem theih loh chhanah hian party pahnihte hi an inpuh tawn nasa hle.